講下減肥

睇到新聞，連鎖健身中心California fitness全線暫停營業。呢間野，我以前join過一年會籍，physical fitness都join 過一年，同樣無乜好感，太hard sell，阻住我做運動。我以前肥少少，California fitness的sales sell 我揾教練減肥，佢話以男性角度黎講，我最好瘦多少少喎。佢會同你講健康、講脂肪比例、講身材，講講講.....

總之，煩到你嘔果種！

我覺得，減肥揾健身教練 / 營養師都係ok的。他們是專業人士，有專業知識。不過價錢好貴，睇你負唔負擔得來啦~ 我用跑步+跳鄭多燕減左10磅，無見幾年的朋友都話我瘦左，呵呵。當然，我用三年減10磅，係無人地三個月減10磅咁突出。觀眾鐘意睇before and after，減10磅沒什麼看頭，如果好似欣宜咁，由超過200磅減到115磅，就變了瘦身界奇蹟。哈哈，不過最緊要自己keep fit 自己開心，減得快就反彈得快，體重維持住6-8個月不變，就唔會咁易肥返。

消耗3500卡路里=減1磅脂肪，條數大約係咁計。跑一次步，45分鐘，400卡路里。如果每星期跑一次，8個星期減到一磅。當你新陳代謝快d，肌肉量多d，身體線條會變得更好。體重用來參考下就算，數字一個，我而家133磅，講俾你聽又有乜所謂。

減肥係辛苦，你估我剛剛開始做運動時唔辛苦咩？

不過這個是必經階段，有了運動習慣，身體好了，個人心情都會變好。現在跑步對我黎講已經唔辛苦，仲跑得幾開心。唔鐘意跑步的朋友，咪做其他運動，一樣得。

我最唔buy 的減肥方法係食代餐。無得食，仲要俾錢買代替品，真慘。俾你減到，唔通你下個月又食代餐咩，你吸收返正常卡路里，體重會回升。市面上好多減肥產品，多數係有甲殼素，用來阻止油脂在消化道中被吸收。除非你餐餐大魚大肉，否則你正常食個飯加粒減肥藥唔會有乜效果。

至於最近比較出名的o 字頭和g 字頭的減肥健康食品，成份有瓜拿納提取物，唔排除係減到肥，但裡面有好高含量的咖啡因，長期攝取就好似飲好多杯咖啡咁，你諗你喇。

以上內容不是專業意見，只係個人經驗分享下，減肥唔係得一個方法既。

屋企跑去深水灣，有靚風景!