2016年5月6日 星期五

週一迪士尼

上星期五六感冒發燒一齊來,病到無心機煲劇。幾日無見過劉大尉,今晚再繼續,睇宋慧喬救人睇到我眼濕濕,天災人禍真係好慘。最慘係好人要死,但係衰人係度搞搞震。

週末休息完瞓完,病都好得差唔多,星期一就入迪士尼玩。我第一次去,同行的友人們都表示好驚訝,事關其他幾個都去過無數咁多次,有兩位仲要係迪士尼舊員工,做左好耐,熟到連廣播都會背,哈哈。有山大的朋友帶路,好似有個導遊一樣,講解迪士尼歷史,唔同的遊戲設施,又講下最近迪士尼炒人的公司政策。在迪士尼返工係幾得意,不過福利人工待遇都唔好,你諗你喇。星期一落了一陣大雨,傾盆大雨果種,見住d 員工仲要披住雨衣企在露天地方,睇見都覺得辛苦,日曬雨淋真係唔啱我,我都係揀返坐office 啦。

機動遊戲我係唔玩的,係唔鐘意,完全無興趣。但係第一站去了space mountain,我有玩,玩完暈暈地,過山車真係同我好唔夾。阿glen 都話玩完頭暈,之後佢同我一樣無去玩沖天遙控車,我倆睇到其他人尖叫已經淆底。


























影張相~當玩左。睇下呢個U字,加埋現場發自內心的尖叫聲,我認我是淆底。

天陰陰,再加上朋友講鬼故,個feel 幾好。夜晚關門後的迪士尼,無哂遊人,得返d 會郁的「玩具」,真心恐怖。佢地話小小世界最驚,有次見到有個濕了衫的老婆婆坐在水池邊,勁驚嚇。我諗起暑期工在幼稚園做野加班都係咁,最後一個收工要熄哂所有電掣,摸黑地由幼稚園最入面行返出去,「沿途」會經過有好多玩具車和公仔,驚過行鬼屋。

我地一行人仲去了以下地方
玩具兵團跳降傘, 小小世界, 米奇幻想曲, 童話園林 
睡公主城堡, 夢想花園, 巴斯光年星際歷險, 迷離大宅, 幸會史迪仔

以上全部我都好鐘意。迪士尼好靚的,好像離開了繁忙的現實咁。我下次會再去,希望下次天氣好d,太陽伯伯給力一點,可以影d 靚相啦。

0 意見:

張貼留言