迪士尼10公里跑

上個月去左個迪士尼10公里跑。

平時都有跑下步，不過都係4,5公里咁，10公里唔係冇，不過要數兩三年前。跑步我真係好弱，不過又幾鐘意，跑跑下都進步左少少。

11月29日早上，應該係半夜先啱，天都未光我就出發去迪士尼樂園，5:45a.m.我已經到左集合地點喇，係咪好早呢？我真係覺得唔洗咁早架，距離我起跑時間仲有一個半鐘，不過我係坐大會安排的接駁巴士，冇法啦咁。熱身了一會，我就覺得眼瞓喇，然後坐在地上睇住個天慢慢光，天光後同事們才陸陸續續到達。

7:15a.m. 起跑 - 開頭第2-3km係上個小斜坡，有d攰架，但之後全程都幾順利。開頭真係凍凍地，跑左7km之後天氣變得好熱好熱! 唔係因為我做緊運動，而係我懷疑當時氣温係真係有27-8度，太陽哂到我對眼都睜不開。果段路係我的7km，亦係半馬參加者的18km，所以已經有人步行喇，我都好攰，所以都放慢左好多，一齊行。我見到7km 站的義工們都已經熱到坐低休息緊，沒有人幫參加者打氣，有一個仲好似瞓著左添(哂住日光浴咁瞓...都幾舒服喎)。

跑到9-10km 係唔太辛苦的，因為入左樂園裡面，好多大樹可以擋陽光。原先諗住跑到最尾100米，會發力奔去終點，但原來係唔得架，因為我已經用完d體力了，只可以維持小跑步咁去完成埋佢。哈哈，同想像有d出入，跑完後腳板底仲有dd痛，不過跑緊的時候又唔覺喎。

完成時間係87分鐘39秒。好啦，龜速完成，已經收貨。下次再努力~加油